ئۇيغۇرچە uyghurche Уйғурчә قازاقشا 中文 يانفون نۇسخسى
ئورنىڭىز : ئۇيغۇرچە - باش بەت - جەمئىيەت ۋە قانۇن

مۇتەخەسىسلەر ئەر-خوتۇننىڭ ئورتاق قەرزى تۈزۈمىنى مۇكەممەللەشتۈرۈش تەكلىپى بەردى

يوللانغان ۋاقىت : 2018 - يىلى 09 - ئاينىڭ 07- كۈنى 03:21   |    ئاپتور :   |   مەنبە : خەلق تورى

    ھەق تەلەپ قانۇنى قائىدىسى ھەرقايسى تارمىقىنىڭ لايىھەسى توغرىسىدا پىكىر ئېلىندى

    خەلق تورى ئۇيغۇرچە قانىلىنىڭ 6- سېنتەبىر بېيجىڭدىن بەرگەن تېلېگراممىسى: ھەق تەلەپ قانۇنى قائىدىسى ھەرقايسى تارمىقىنىڭ لايىھەسى 9-ئاينىڭ 5-كۈنى مەملىكەتلىك خەلق قۇرۇلتىيى تورىدا ئېلان قىلىنىپ، جەمئىيەتتىن ئاشكارا پىكىر ئېلىندى. پىكىر ئېلىش ۋاقتى 2018-يىلى 11-ئاينىڭ 3-كۈنىگىچە بولىدۇ.

    فۇدەن ئۇنىۋېرسىتېتى قانۇن ئىنستىتۇتىنىڭ پىروفېسسورى لى گاڭ مۇنداق دېدى: «ئەر-خوتۇننىڭ ئورتاق قەرزى مەسىلىسى يېقىنقى يىللاردىن بۇيان نۇرغۇن تالاش-تارتىش كەلتۈرۈپ چىقاردى، بۇ قېتىمقى لايىھەدە ھازىر يولغا قويۇلۇۋاتقان تويلىشىش قانۇنىدىكى ئەر- خوتۇننىڭ ئورتاق قەرزى ھەققىدىكى بەلگىلىمىگە ۋاقتىنچە ماھىيەتلىك ئۆزگەرتىش كىرگۈزۈلمىدى. ئالىي خەلق سوت مەھكىمىسى بۇ يىل 1-ئايدا ئەر- خوتۇننىڭ قەرزى مەسىلىسى ھەققىدە قانۇن يۈرگۈزۈش ئىزاھاتى ئېلان قىلغان بولۇپ، ئەمەلىيەت داۋامىدا ئۆنۈمى ياخشى بولدى. بۇ قانۇن يۈرگۈزۈش ئىزاھاتىنىڭ تەجرىبىلىرىنى ھەق تەلەپ قانۇنى قائىدىسى لايىھەسىگە كىرگۈزۈپ، ئەر- خوتۇننىڭ ئورتاق قەرزى تۈزۈمىنى مۇكەممەللەشتۈرۈش تەكلىپى بېرىمەن».

    يېقىندا ئۆتكۈزۈلگەن 13-نۆۋەتلىك مەملىكەتلىك خەلق قۇرۇلتىيى دائىمىي كومىتېتىنىڭ 5-يىغىنىدا، ھەق تەلەپ قانۇنى قائىدىسى ھەرقايسى تارمىقىنىڭ لايىھەسى قاراپ چىقىلدى. گۇرۇپپىلارغا بۆلۈنۈپ قاراپ چىققاندا، نۇرغۇن دائىمىي كومىتېت تەركىبىدىكىلەر ئوخشاشلا ئالىي خەلق سوت مەھكىمىسىنىڭ مۇناسىۋەتلىك قانۇن يۈرگۈزۈش ئىزاھاتلىرىنى لايىھەگە كىرگۈزۈپ، ئەر-خوتۇن ئارىسىدىكى قەرزلەردە «ئورتاق قەرزگە ئورتاق ئىمزا قۇيۇش» پىرىنسىپىنى ئايدىڭلاشتۇرۇش تەكلىپى بەردى.

    يىغىنغا سىرتتىن قاتناشقان مەملىكەتلىك خەلق قۇرۇلتىيى مۇھىت ۋە بايلىق ئاسراش كومىتېتىنىڭ ئەزاسى تەن لىن: «‹ئورتاق قەرزگە ئورتاق ئىمزا قۇيۇش› دۆلىتىمىزنىڭ ئائىلە، ئەر- خوتۇنلۇق مۇناسىۋەتنىڭ باراۋەر ۋە ئۆزئارا ھۆرمەت قىلىش ئاساسىي پىرىنسىپىغا ماس كېلىدۇ. ئائىلىنىڭ كۈندىلىك تۇرمۇشىدىن باشقا يۇقىرى سوممىلىق قەرزلەرنى ئەر- خوتۇن ئوتتۇرىسىدا ئۆز ئارا مەسلىھەتلىشىشى كېرەك، ئىككى تەرەپنىڭ ئورتاق قوشۇلۇشىدىن ئۆتكەندە، ئاندىن ئورتاق قەرز دەپ قارىلىدۇ»، دېدى.

    ئاشكارا پىكىر ئېلىنىدىغان ھەق تەلەپ قانۇنى قائىدىسى ھەرقايسى تارمىقىنىڭ لايىھەسى: نەرسە ھوقۇقى قىسمى، توختام قىسمى، كىشىلىك قەدىر- قىممەت ھوقۇقى قىسمى، توي-ئائىلە قىسمى، ۋارىسلىق قىسمى، ھوقۇققا چېقىلىش جاۋابكارلىقى قىسمى قاتارلىق جەمئىي ئالتە قىسىمنى ئۆز ئىچىگە ئالىدۇ، جەمئىي 1034 ماددا بولۇپ، ئېلىمىزنىڭ ھازىر يولغا قويۇلۇۋاتقان ھەق تەلەپ قانۇنىنىڭ ئومۇمىي قائىدىسى، نەرسە ھوقۇقى قانۇنى، تويلىشىش قانۇنى قاتارلىق ھەق تەلەپ قانۇن-قائىدىلىرىنى ئومۇميۈزلۈك، سىستېمىلىق قانۇن دەستۇرى قىلىپ تۈزۈپ چىقىدۇ. ھەق تەلەپ قانۇنى قائىدىسى ھەرقايسى تارماق لايىھەسىنىڭ مەملىكەتلىك خەلق قۇرۇلتىيى دائىمىي كومىتېتىنىڭ قاراپ چىقىشىغا سۇنۇلۇشى دۆلىتىمىز ھەق تەلەپ قانۇن قائىدىسىنىڭ «2-قەدەم»نى باسقانلىقىدىن دېرەك بېرىدۇ.

    http://uyghur.people.com.cn/155989/15733285.html

مۇھەررىر : دىلارە خەمىت

قىززىق نوقتا

ئاكادېمىيە

شىنجاڭ

مۇھاكىمە مۇنبىرى